డిగ్రీలో చేరే విద్యార్థులకు శుభవార్త – కొత్త కోర్సులు అందుబాటులోకి!

ఇప్పటివరకు క్వాంటం కంప్యూటింగ్‌, కృత్రిమ మేధ (AI), మెషిన్ లెర్నింగ్‌ వంటి అత్యాధునిక సాంకేతిక కోర్సులు కేవలం బీటెక్‌ విద్యార్థులకే పరిమితంగా ఉండేవి. కానీ ఇక నుంచి రెగ్యులర్‌ డిగ్రీ కోర్సులలోనూ ఇవి చేరబోతున్నాయి. ఈ కొత్త కోర్సులను డిగ్రీలో ప్రవేశపెట్టేందుకు ప్రభుత్వం నిర్ణయం తీసుకుంది. దీని కోసం ఉన్నత విద్యామండలి కొత్త సిలబస్‌ రూపకల్పనలో నిమగ్నమై ఉంది.

డబుల్ మేజర్ విధానం

ఇప్పటి వరకు ఉన్న సింగిల్ మేజర్‌ విధానాన్ని మార్చి, కొత్తగా డబుల్ మేజర్ విధానాన్ని తీసుకొస్తున్నారు. అంటే విద్యార్థి రెండు ప్రధాన సబ్జెక్టులను ఎంపిక చేసుకోవచ్చు. మొదటి మేజర్‌కు 48 క్రెడిట్లు, రెండో మేజర్‌కు 32 క్రెడిట్లు ఉండేలా చేస్తారు. ఇలా విద్యార్థులు రెండు సబ్జెక్టుల్లో నైపుణ్యం సంపాదించగలుగుతారు. పీజీ చదవాలంటే వీటిలో ఏదైనా ఒక మేజర్‌ సబ్జెక్టు ఆధారంగా వెళ్లవచ్చు.

AI, క్వాంటం కంప్యూటింగ్‌ మైనర్‌గా

డబుల్ మేజర్‌తో పాటు మైనర్ సబ్జెక్టులుగా క్వాంటం కంప్యూటింగ్, AI, మెషిన్ లెర్నింగ్ కోర్సులను ప్రవేశపెడుతున్నారు. ముఖ్యంగా B.Sc. (Computers) విద్యార్థులకు క్వాంటం కంప్యూటింగ్‌ను తప్పనిసరిగా చేస్తారు. ఇతర స్ట్రీమ్‌ల విద్యార్థులు ఇవి మైనర్ సబ్జెక్టులుగా ఎంపిక చేసుకోవచ్చు. BA, B.Com విద్యార్థులు కూడా ఆసక్తి ఉంటే ఇవి నేర్చుకునే అవకాశం కలిగిస్తుంది.

నైపుణ్యాభివృద్ధికి ప్రత్యేక కోర్సులు

విద్యార్థుల నైపుణ్యాల అభివృద్ధికి “డిజైన్ థింకింగ్” మరియు “ప్రాబ్లం సాల్వింగ్” వంటి కోర్సులను సైతం కొత్తగా ప్రవేశపెడుతున్నారు. ఇవి ప్రస్తుతం పరిశ్రమల్లో ఉద్యోగ అవకాశాల్లో ముఖ్యంగా పరిగణించబడుతున్నాయి.

ఇంటర్న్‌షిప్‌లో మార్పులు

ఇప్పటి వరకు మూడు విడతలుగా ఇంటర్న్‌షిప్‌లు ఉండేవి. ఇకపై మాత్రం దీన్ని ఒకే విడత ఇంటర్న్‌షిప్‌గా నిర్వహించేందుకు ప్రణాళిక రూపొందించారు. ముందుగా సమాజ సేవా ప్రాజెక్ట్‌, తరువాత సబ్జెక్ట్ ఆధారిత ఇంటర్న్‌షిప్, చివరికి సెమిస్టర్ ఇంటర్న్‌షిప్ అనే మూడు విడతలను ఒక్కటిగా చేర్చనున్నారు.

What Next

ఈ అన్ని మార్పులు, కొత్త కోర్సుల రూపకల్పనపై ప్రొఫెసర్ వెంకయ్య నేతృత్వంలో రూపొందించిన కమిటీ నివేదికను ఉన్నత విద్యామండలి సిద్ధం చేసింది. మండలి ఛైర్మన్ కృష్ణమూర్తి అన్ని యూనివర్శిటీల వీసీలతో వర్చువల్‌గా సమావేశం నిర్వహించారు. వారి అభిప్రాయాలు సేకరించారు. ఇప్పుడు కొత్త కరికులం ప్రభుత్వానికి సమర్పిస్తారు. ప్రభుత్వం ఆమోదం తెలుపితే, వర్సిటీలు అకడమిక్ విభాగంలో అమలు చేస్తాయి.

Read also : లెఫ్టినెంట్ హోదాతో శాశ్వత ఉద్యోగం… నెలకు రూ.లక్ష వేతనం!